شعر کلیات اشعار ترکی شهریار

[fatemeh d]

كتدي يازيق چراغ تاپمير يانديرا،

گوروم سيزون برقوز قالسين آنديرا،

كيم بوسوزي اربابلارا قانديرا،

نه دور آخر بو ملتين گناهي،

توتسون، گوروم، سيزي مظلوملار آهي!​

 

[fatemeh d]

هرنه آلار، باهاوئرر قيمتي،

اوجوز-فقط اكينچنين زحمتي ،

بيته نينن آرتيق بيچه نينين اجرتي ،

كند اوشاغي گئدير يولدا ايشليه

اوردا، بلكه، قندي تاپا ديشليه!​

 

[fatemeh d]

كتدي گلين كيمي دنياني بزه ر،

ئوز عورتي ياماق – ياماقا دوزه ر،

اينه بزه ر خلقي، ئوزي لوت گزه ر،

ايندي ده وار چارشابلاري آلباقدي!

اوشاقلارين قيش- پاچاسي چيلپاقدي!​

 

[fatemeh d]

خلورچيلر بوردا خلور داشيردي.

بوكوللوكدن اولاخلاردير ماشيردي.

سئللر كيمي، نعمت آشوب – داشيردي.

هرايش دئدون، هركيمسييه گورردي،

جان درماني ايسته سيدون، وئرردي.​

 

[fatemeh d]

ايندي بشر آژقود تكين اودوخوب،

چومبلنتي گوزقيجير دوب، دوروخوب.

باخيللاركي گورسونلر كيم سينيخوب،

توكولسونلر، اونون لشين يرتسين لار!

هره بير ديش انسه سينه قيرتسين لار!​

 

[fatemeh d]

بودوشلرده، قوزولاري يا ياردوق!

آخماسينلار، اولدوزتكين ساياردوق!

قوش قوواني چكيب داشا داياردوق!

قوش قووان دا ايله بيل كي قاباندي!

قورد، اوزاقدان ديير بس كي چوباندي.​

 

[fatemeh d]

بوزه ميده گئدوب گوزدن ايترديك،

تونقال قوروب، سوتوللري اوترديك!

دييوب – گولمك مرادينا يترديك!

ائل ده گولسون، مرادينا يتيشسون!

اوركلرين يارالاري بيتيشسون!​

 

[fatemeh d]

حيدر بابا، سنده دفينه لر وار،

داغلار وديعه سي خزينه لر وار،

آما سنه بنزه ر ده سينه لر وار،

بو سينه لر داغلار ايله دانيشير،

داغلار كيمي گوگلر ايله قونوشير.​

 

[fatemeh d]

گور هاردان من سنه سالديم نفسي،

دئديم قايتار سال عالمه بو سسي،

سن ده ياخشي سيمرغ ائتدين مگسي،

سانكي قاناد وئردين يئله، نسيمه،

هر طرفدن سسس وئرديلر سسيمه.​

 

[fatemeh d]

حيدر بابا، سني وطن بيلميشديم،

وطن دييب، باش گوتوروب گلميشديم،

سني گوروب گوز ياشيمي سيلميشديم،

حالبوكي لاپ غملي غربت سنده ايميش،

قارا زندان، آجي شربت سنده ايميش.​